Akademici stem saam met stakende dokters oor die haglike toestande in staatshospitale.
Woensdag het dokters en aptekers in die provinsie die staat se finale salarisaanbod van die hand gewys en gesê die staking gaan voort. Hospitale wat geraak word is Groote Schuur, Tygerberg, Somerset en GF Jooste.
Stellenbosch Universiteit en die Universiteit van Kaapstad (UK) sê die huidige toestande in die hospitale maak dit uiters moeilik vir gesondheidswerkers om ’n professionele diens te lewer.
“As die krisis sou toeneem, sal dit bykans onmoontlik wees om mediese studente en spesialiste op te lei en kliniese dienste aan pasiënte te lewer,” het die komitee vir mediese dekane by UK gesê.
